A Casa da Cultura de Boiro acolle este venres 2 de decembro a presentación dunha peza para público infantil e familiar: o espectáculo Ninja, de Teatro de Ghazafelhos. Será ás 20.00 horas. As entradas poden adquirirse o mesmo día da función a partir das 19.00 horas.
A obra cóntanos a historia de Amelia, unha nena do rural que vai á escola e á que lle encanta a cultura oriental, o karate, o kung-fu, o jiu-jitsu, as películas de Bruce Lee e de Jackie Chan, e que soña con ser ninja, polo que adestra todos os días para pasar inadvertida e observar aos demais como unha auténtica guerreira oriental… Grazas a esa condición descobre que no cole hai nenos e nenas que tamén queren pasar inadvertidos, pero non para ser ninjas, senón, para que outros nenos e nenas non abusen deles. Coa axuda de Amelia e o señor Edelmiro, un velliño ao que Amelia acode a buscar consello, conseguirán que os nenos inadvertidos se fagan visíbeis e cambien as tornas na escola.
Ninja é unha obra lúdica e pedagóxica onde se trata o tema do acoso escolar. A través dunha historia divertida e chea de frases filosóficas sobre a tolerancia, o respecto, a diversidades, amosa o máis importante para resolver un problema: visualizalo.
Compañía: Ghazafelhos
Xénero: teatro comedia
Autoría e dirección: Pepablo Patinho
Escenografía, deseño de son, deseño de iluminación, vestiario e música: Ghazafelhos
Elenco artístico: Montse Piñón, Jorge Casas e Pepablo Patinho
Idioma: galego
Idade recomendada: + 5 anos
