O delegado territorial da Xunta na Coruña, Ovidio Rodeiro, informou da resolución dos Programas Integrados de Emprego (PIE) para Concellos na comarca do Barbanza. O PIE é unha iniciativa na que colaboran os concellos e a Xunta de Galicia co obxectivo de mellorar a formación das persoas desempregadas e darlle máis opcións para atopar un traballo a través de actuacións que buscan a especialización grazas á posibilidade de combinar orientación e asesoramento con formación e prácticas.
O representante do goberno autonómico anunciou que na área de influencia do Barbanza realizarase un PIE en Boiro. Segundo precisan, este programa permitirá formar a 100 desempregados dos cales, cando menos, un 35% lograrán inserirse no mercado laboral. Neste senso, o curso suporá un investimento na comarca de 250.000 euros.
No conxunto da provincia, a Xunta vai desenvolver, nesta nova convocatoria, un total de nove programas integrados cun investimento que supera os 1’9 millóns e chegarán a 900 desempregados. Así, coa participación de 22 concellos, a Xunta aposta por potenciar a colaboración para dar novas oportunidades laborais á cidadanía.
Ovidio Rodeiro apuntou que “unha das apostas máis importantes da Consellería de Economía, Emprego e Industria son os programas formativos que, cada vez máis, están orientados a cubrir as demandas reais das empresas das contornas o que permite unha posterior integración laboral máis alta.” Ademais, engadiu que “outra das apostas importantes é complementar a formación con prácticas en empresas para garantir unha inserción real e duradeira no tempo.”
Entre os programas máis importantes da Xunta que se desenvolven na contorna do Barbanza, destacan os 20 cursos do Plan Galego de Formación 2018-2019 (AFD), os cales contarán cun investimento de 830.000 euros, así como os 5 Obradoiros de Emprego que suman 1’2 millóns de euros. En total, agregando o PIE, a Xunta de Galicia investirá en plans de formación da comarca do Barbanza máis de 2’2 millóns de euros.
