As nosas praias sofren cada vez máis a presión contaminante do ser humano pero, ao mesmo tempo, contan con máis aliados para preservalas e protexelas para as vindeiras xeracións. Por exemplo JEALSA Rianxeira e Ecomar, que estableceron recentemente un acordo para coidar o medio ambiente poñendo o foco nun dos principais puntos sensíbeis: os areais. Froito deste acordo foi un programa de actividades para desenvolver en común coa rapazada dos colexios, fomentando deste xeito a sensibilización e a concienciación dende idades temperás. Ao abeiro deste programa, esta semana JEALSA, Ecomar e a rapazada de Boiro baixaron a pé de praia para limpar o areal de Carragueiros. As xeiras de traballo conseguiron sacar da praia máis de 250 quilos de lixo.
Participaron arredor de medio cento de voluntarias e voluntarios do Colexio de Santa María do Castro. Amais de profesores e alumnado, tamén se uniron ás tarefas a directora de Sostibilidade de JEALSA, Ángeles Claro, e a directora de Relacións Institucionais Marga Hermo. O groso dos refugallos estaba constituído polas consabidas cabichas do tabaco (a gran praga dos areais e de todo espazo natural para o lecer), latas, recipientes plásticos e restos de aparellos e útiles pesqueiros.
A xeira de traballo, antes de metérense os seus integrantes en faena, comezou cun obradoiro de concienciación a cargo dos integrantes da entidade Ecomar, que fixo fincapé na importancia de fomentar as segundas e terceiras de vida daquilo que consumimos. A cita medioambiental terá continuidade o día 22 deste mes cunha limpeza análoga na praia de Mañóns que contará coa participación activa das mozas e mozos do cole de Abaqueiro. O 23 haberá xeira en Barraña. Quen queira inscribirse pode facelo en info@jealsa.com.
