Este sábado 19 de novembro vaise clausurar no Museo do Gravado de Artes (Ribeira) a exposición Ukiyo-e. A beleza e a cor do efémero. Será ás 12.30 h na sala 1 do Museo do Gravado de Artes (Ribeira). A mostra pecharase cunha visita guiada coa que mostrar os detalles do mesmo ás persoas asistentes. A visita correrá a cargo do comisario da exposición José Daniel Buján Núñez.
Ukiyo-e é un xénero de gravados producidos en Xapón entre os séculos XVII e XX. A temática principal son as escenas urbanas, sobre todo as actividades de lecer. A exposición que se clausura este sábado é unha escolma de estampas pertencentes á colección particular de José Daniel Buján Núñez. Trátase de gravados que permiten coñecer como era Xapón durante a etapa de goberno dos Tokugawa.
