Logo de dúas datas de paréntese polo mal tempo, retomouse o obradoiro gratuíto de debuxo urbano impulsado pola Concellería de Servizos Sociais, en colaboración co Fondo Galego de Cooperación e Solidariedade, e que estivo destinado para mozos e mozas de 16 e 19 anos. Foron en total doce as rapazas participantes nesta actividade ao aire libre celebrada o venres pasado pola tarde xunto á fábrica de salgadura da punta do Castro.
Empregando lapis e grafito acuarelábel (art graft) recrearon algunhas das vistas que dende alí se divisan baixo a guía de integrantes da escola profesional de banda deseñada e ilustración profesional de Pontevedra O garaxe hermético. Tamén estivo con elas a concelleira Ana Barreiro Rego.
Este obradoiro estase a impartir en varios concellos de Galicia co obxectivo de reivindicar a paisaxe e o entorno dende un punto de vista de concienciación ecolóxica e sustentábel. En datas vindeiras elaborarase un libro, cos debuxos realizados e os textos do escritor Manuel Lourenzo González, que se distribuirá entre as persoas que participen na actividade.
O Concello de Ribeira é socio colaborador do Fondo Galego de Cooperación e Solidariedade dende hai mais dunha década. Trátase dunha asociación sen ánimo de lucro integrada por administracións locais de Galicia unidas pola vontade común de contribuír á erradicación das desigualdades norte-sur, a través de proxectos de cooperación ao desenvolvemento con países empobrecidos e a sensibilización social en Galicia. Para ampliar información sobre esta plataforma pódese consultar a web www.fondogalego.gal.
