O alcalde de Boiro, José Ramón Romero, e o tenente de alcalde, Luís Ruiz, mantiveron unha xuntanza co xefe territorial de Infraestruturas e Mobilidade, José Antonio Álvarez, e o xefe de servizo de Mobilidade, César Concheiro, e a empresa adxudicataria para trasladarlles as demandas e incidencias do transporte público no municipio.
Entre as peticións trasladadas ao Concello pola comunidade educativa están os atrasos na hora de chegada e recollida dos centros; a suspensión de paradas ou o cambio doutras… “Nos primeiros días de curso chegáronnos numerosas queixas sobre o transporte escolar por parte da dirección dos centros e das ANPAs, polo que lle trasladamos a Mobilidade todas as demandas para atopar solucións”, recoñeceu o alcalde.
Ademais das incidencias no transporte escolar, no desenvolvemento da xuntanza o alcalde fíxolles chegar outras demandas nas liñas regulares de transporte que comunican o municipio con outros concellos limítrofes. Algunhas das principais reclamacións das persoas usuarias son o non cumprimento dos horarios de recollida e paso polas paradas e tamén as conexións de Boiro coa zona sur da comunidade e tamén as conexións con Noia.
“Hai unha gran cantidade de desprazamentos entre Noia a Boiro polos servizos compartidos entre ambos municipios como o conservatorio, a Escola de Idiomas ou o SEPE e as malas conexións en transporte público fan que moitas persoas non poidan desprazarse para levar a cabo xestións”, afirmou o alcalde, que engadiu o seguinte ao remate da reunión: “A xuntanza foi moi frutífera, onde analizamos os principais puntos nos que hai carencias no servizo para traballar para melloralos e ofrecer á veciñanza un transporte público de calidade e que cubra as necesidades”, afirmou José Ramón Romero.
