Un grupo formado por corenta mozos e mozas italianos participantes na Peregrinación Xuvenil Europea principiaron a primeira hora da mañá deste 29 de xullo o Camiño de Santiago A Orixe, o percorrido xacobeo que discorre pola nosa comarca.
Os peregrinos, pertencentes á diocese de Lucca, foron acompañados polo concelleiro Víctor Reiriz, quen tamén estivo este xoves 28 representando ao Concello na presentación desta acción na Pobra a iniciativa da Mancomunidade Barbanza Arousa e a Asociación de Amigos do Camiño A Orixe.
Os camiñantes alcanzaron a praza da Porta do Sol ás dez da mañá e alí tiveron ocasión de selar as credenciais para gañar a Compostela unha vez alcanzada a catedral de Santiago. Alí foron recibidos pola tenente de alcalde María Sampedro.
