O Concello de Boiro propón para o seu debate no pleno que se celebrará o vindeiro xoves unha proposta de incremento nas nominativas que a entidade local concede ás entidades sociais. En total incrementase en 12.000 euros o importe destinado a subvencións nominativas a entidades sociais con respecto a 2021.
“Continuamos a fortalecer a rede de servizos sociais do Concello de Boiro e este ano, ademais do aumento na partida orzamentaria destinada a estas entidades, incorpóranse outras novas que prestan servizo no noso municipio”, recoñeceu o alcalde, José Ramón Romero. Neste ano concédense subvencións nominativas ás entidades Ambar e Renacer, para impulsar o seu traballo no municipio.
O Goberno local lembrou que o aumento das contías e os conceptos de xustificación foron previamente acordados coas entidades co obxectivo de “axustar os recursos públicos ás necesidades das asociacións”. Segundo informou o concelleiro de Servizos Sociais, Raúl Treus, “colaboramos durante todo o ano coas entidades sociais en beneficio dos boirenses, ese é o noso camiño a seguir, un camiño conxunto de cooperación e colaboración para apoiar e impulsar ás familias”.
Ademais de ampliar o orzamento destinado ás axudas, modifícanse os conceptos e forma de xustificación para que as entidades poidas destinar máis servizos de apoio ao Concello, motivados pola evolución da poboación e as súas necesidades. “O Concello de Boiro, traballando en conxunto coas entidades sociais, é capaz de achegar moitos máis recursos á veciñanza”, recoñeceu o concelleiro.
O alcalde, José Ramón Romero, e o concelleiro de Servizos Sociais, Raúl Treus, falarán máis polo miúdo das axudas este mércores 27 de xullo a partir das 13.30 horas.
