O presidente do Sálvora Club de Fútbol, Ramón Martínez, vai iniciar en breve unha actividade que colle o mellor de dous mundos: o do deporte, por unha banda, e do activismo a prol da xustiza, a liberdade e a solidariedade, pola outra. Máis en detalle, Ramón estase a preparar para percorrer, na compaña de cinco amigos andaluces (Juanma, Pepe, Miguel Anxo, Pepín e Pepe Domingo), a distancia que hai entre París e Bruxelas (284 quilómetros) para esixir ante o Parlamento Europeo a liberdade dos presos políticos saharauís e a independencia do Sahara Occidental.
O reto deportivo, que se vai facer por substitucións, quere ser un esforzo que simbolice a longa espera do pobo saharauí pola súa liberación, amais dun acto que repare, aínda que sexa de maneira pequena e humilde, os longos anos de desleixo de España e de boa parte da comunidade internacional pola causa xusta da antiga colonia española en África.
Segundo explica o propio Ramón Martínez, a saída fixada en Francia non é casual: o inicio da substitución en París ten como obxectivo “facer visible o conflito no país que máis apoiou a Marrocos na ocupación ilegal do territorio e, por tanto, evitou así a celebración do referendo de autodeterminación acordado entre as partes en 1991, baixo os auspicios das Nacións Unidas”.
Ramón recórdanos tamén que a comunidade saharauí e unha feixe de asociacións amigas estarán presentes o venres 1 de novembro, desde as 14:30h ás 15:30h, na Place Saint Michel 75005 Paris, desde onde comeza o evento.
O punto de chegada ao Parlamento Europeo, onde serán recibidos por máis de 100 eurodeputados, será o día 4 de novembro, en Bruxelas e faise para” alertar aos eurodeputados sobre o sufrimento deste pobo e a complicidade da Unión Europea ao desprezar as sucesivas sentenzas do Tribunal de Xustiza da Unión Europea que declarou que os acordos UE / Marrocos non poden incluír Produtos do Sahara Occidental”.
A carreira foi presentada o pasado martes no Consistorio de Lebrija (Sevilla), colaborador no desafío deportivo-solidario.
