Este xoves 30 de xuño o alcalde rianxeiro Adolfo Muíños Sánchez e o concelleiro de deportes Xusto Ordóñez, recibiron no Consistorio a Mauro Domínguez Figueira, campión europeo de K4 nas probas recentemente disputadas en Belgrado e ao seu adestrador Javier Villaverde Pérez “Jabucho”.
Mauro Domínguez Figueira (Rianxo, 2004) é unha das grandes promesas do deporte da nosa comarca. Debutou no piragüismo con 14 anos e pouco despois xa era integrante da selección española.
Na súa xuntanza con Muíños e Ordóñez, Mauro e “Jabucho” falaron da súa experiencia no Campionato Europeo de Belgrado e do seu duro e esixente adestramento diario en terras asturianas con técnicos da selección española, e da súa preparación de cara ao vindeiro campionato en Sevilla.
