Comeza a tempada forte de festas locais na nosa comarca, algunha das cales coincide coa celebración do San Xoán. Unha das máis destacadas citas destes días é a da parroquia de Caamaño, en Porto do Son, que celebra este xoves 23 de xuño, da man da Comisión de Festas, con música, churrasco e a tradicional sardiñada.
As celebracións comezan pola tarde co gran disparo das bombas de palenque anunciando o inicio da troula e continuará ás 21.00 horas, na explanada da Casa da Cultura, cunha gran churrascada-sardiñada acompañada do tradicional pan de boroa e amenizada pola Disco-Móbil CDC. Achegaranse racións de churrasco e sardiñas a prezos populares.
Máis tarde, ás 0.00 horas procederase ao prendido da cacharela e ao inicio da gran verbena musical coa Disco-Móbil CDC. Organiza a Comisión de Festas de Caamaño en colaboración co Concello de Porto de Son e Espectáculos Odisea.
