O vindeiro domingo 3 de xullo regresa a Ribeira o Día da Bici despois de dous anos nos que non foi posíbel celebrar esta tradicional actividade por mor da pandemia. A iniciativa, organizada pola Concellería de Deportes, ten “un carácter lúdico-recreativa” e está aberta a persoas de todas as idades no ánimo de fomentar e reivindicar o uso da bicicleta.
A cita arrancará ás 11 da mañá da praza de España (haberá que confirmar a participación no punto de saída dende unha hora antes) para trazar un percorrido urbano que desembocará no mesmo punto en torno ás 12 do mediodía. O casco é obrigatorio.
Sorteo
Unha vez rematado o percorrido, realizarase entre os participantes un sorteo de material relacionado con este medio de transporte de dúas rodas.
As inscricións (de balde) están abertas dende este mércores 22 de xuño e rematarán o xoves 30 de xuño ás 12 do mediodía. Pódense formalizar na páxina web www.ribeira.gal.
Colaboran na iniciativa o club Os Saltamontes e as tendas de bicicletas, Sportbike e Quintena, ademais de Policía Local, Protección Civil e Asociación de Veciños de Carreira.
