O Goberno galego informou da apertura da consulta cidadá para dar forma á aplicación A Xunta no móbil, que é a ferramenta móbil que permitirá o acceso aos servizos da administración dende dispositivos. Baixo o epígrafe Eu participo, a sede electrónica da Xunta de Galicia abriu este luns 20 a dita recepción de suxestións da cidadanía. As persoas que participen nesta consulta poderán valorar a importancia dunha serie de servizos para a súa inclusión na aplicación, e poderán tamén suxerir outras funcionalidades para a nova ferramenta.
Xunta EU será a aplicación móbil de referencia e ofrecerá os ervizos da administración dixital “dun xeito doado, inmediato, personalizado e adaptado ás características dos dispositivos móbiles”, en palabras da Axencia para a Modernización Tecnolóxica de Galicia (AMTEGA), encargada da creación desta app, que destaca que para o seu desenvolvemento “primarase a accesibilidade e a usabilidade”.
Entre os servizos que está previsto que estean incluídos na aplicación atópanse o acceso as tarxetas acreditativas, como o carné para xente nova ou a de familia numerosa, así como a obtención dos diferentes certificados oficiais.
A cidadanía poderá tamén xestionar desde teléfonos ou tabletas as citas coas oficinas de atención a cidadanía e rexistro, e recibirá todo tipo de avisos como o que advirte da proximidade da caducidade da Chave 365.
A nova aplicación incluirá, entre outros aspectos, a xestión dos datos persoais da Carpeta Cidadá, a consulta de expedientes, a consulta das entradas realizadas no rexistro, a consulta de apoderamentos ou a consulta de prestacións dos Servizos Sociais. A aplicación permitirá tamén firmar de xeito electrónico documentos administrativos dende os dispositivos móbiles.
A través do teléfono, as persoas usuarias poderán tamén subscribirse a informacións da Xunta en función dos seus interese, así como trasladar todo tipo de queixas e suxestións.
A Xunta no móbil é un dos obxectivos da Estratexia Galicia Dixital 2030 e estará incluído no III Plan de Administración e Goberno Dixital 2025 que será aprobado proximamente polo Consello de Goberno.
