Este luns 9 de maio (e até o vindeiro día 26) comezou na Pobra o curso municipal de operacións básicas en cafetaría e bar posto en marcha pola Concellaría do Desenvolvemento Local da Pobra do Caramiñal. A actividade, que se celebra nun coñecido establecemento local, é froito de conversas mantidas co sector da restauración.
Nesta acción formativa participa un total de 15 persoas que foron recibidas pola edil Amparo Cerecedo (BNG).
A finalidade deste curso é crear un novo mecanismo de cualificación laboral que redunde nunha mellora da formación e da empregabilidade. A materia divídese en dúas partes: unha específica de camareiro/a e outra de manipulación de alimentos. Ademais, existe un compromiso de contratación, polo cal 5 das persoas asistentes comezarán a traballar unha vez finalizada a formación.
