Cultura de Noia compartiu tamén a axenda de actividades para este Mes das Letras 2022, un menú de propostas para todas as idades que inclúe teatro, música, presentacións literarias e homenaxes concretas (o 17 de maio) a Florencio Delgado Gurriarán e escritores locais como Antón Avilés de Taramancos e María Mariño. A axenda deu comezo o sábado 7 coa estrea en Noia (Coliseo Noela) de Libre coma os paxaros, de Teatro Atlántico, e prosegue o día 14 con outra función teatral: a de Dreaming Juliet, de Elefante Elegante (ás 20.30 horas no Coliseo Noela). O día 15 será a quenda da música, a cargo de Taburete (en acústico), no Coliseo Noela ás 20.00 horas (concerto en beneficio de Cáritas e a Cruz Vermella).
O Día das Letras Galegas, 17, as actividades comezan ás 12.00 cunha ofrenda floral ante os monumentos de Avilés de Taramancos e María Mariño. Contarase coa presenza de Serafín Marcos (Coa ledicia de voltar) e da Escola de Danza Oitos (O nacemento duns versos). Ás 13.00 actuará a Banda de Música Vila de Noia.
O día 21 (ás 20.00 horas no Coliseo Noela) volve o teatro con Rubindo Rochedos (contos lendas e cafés da Compañía 5s) e domingo 22 (ás 17.30 horas no Coliseo Noela) culminarán as actividades do programa Musicalizando da Concellería de Cultura. (entrada libre até completar aforo). O día 23 presentarase o libro Onde as rúas non teñen nome, de Xurxo Ayán, ás 20.00 no Dolmen Cova da Moura. E o venres 27, ás 20.30 horas no Noela, o alumnado do Conservatorio ofrecerá un concerto arredor de Felipe Paz Carbajal. Ao día seguinte, sábado 28 (ás 19.00 horas), Viravai ofrecerá un concerto para a rapazada: A miña lingua, a túa lingua. Será novamente no Coliseo Noela (axenda de FalaRedes da Secretaría Xeral de Política Lingüística).
