Rianxo vai acoller dous concertos de tributo ao compositor galego Carlos García López-Picos (Betanzos, 1922–Oleiros, 2009), do que se están a celebrar estes días o centenario do seu nacemento. Estes concertos, que veñen da man do departamento de Cultura da Deputación da Coruña, arrincaron o 29 de abril no Pazo de Mariñán e está previsto que este maio o ciclo de actuacións percorra diversos escenarios da provincia: o salón de actos da Casa Dopeso das Pontes, os días 7 e 14 de maio; o Auditorio Municipal de Rianxo, o 20 e 21 de maio; e a Aula de Cultura Xulio Cuns de Betanzos, o 27 e o 28.
O primeiro concerto, o do 20 de maio, en Rianxo será ás 21.00 h e é unha actuación para violonchelo e piano que contará coa presenza da violonchelista Teresa Morales Diego e o pianista Javier Ares Espiño, que interpretarán partituras de Manuel de Falla, García-Picos, Isidro B. Maiztegui e Astor Piazolla.
A do 21 de maio en Rianxo, ás 21.00 h, será unha actuación para voz e piano coa soprano Susana de Lorenzo e o pianista Alejo de Lorenzo, que ofrecerán a súa versión de obras de obras de Marcial del Adalid Gurrea, Eugenia Osterberger Luard, Andrés Gaos Berea, García-Picos e Juan Durán Alonso.
A reserva de localidades realizarase na web do Concello, na sección de reservas.
O compositor
Compositor e director de coros galego-arxentino, Carlos López García-Picos, desenvolveu gran parte da súa actividade en Bos Aires, onde contactou coa intelectualidade galeguista. Na súa formación destaca unha estancia de varios anos en Francia, onde estudou na Schola Cantorum e no Conservatorio Nacional de París. Foi o principal impulsor, socio e membro de honra da Asociación Galega de Compositores e mantivo na capital arxentina un compromiso constante coa comunidade galega, reflectida en moitos aspectos da súa obra.
