Con vistas a mellorar os espazos de importancia ambiental e reforzar os seus atractivos turísticos de cara a esta tempada de primavera-verán, o Concello de Boiro comezou as tarefas de limpeza de praias. Púxose o foco en acondicionalas e en devolverlles o esplendor logo do inverno e dos fenómenos costeiros máis adversos. As actuacións comezaron polos areais de maior dimensión como son Mañóns, Carragueiros ou Barraña para logo facerse de xeito progresivo nas demais praias e calas do termo municipal.
Nesta primeira limpeza que se comezou a realizar esta semana estase a facer unha recollida de residuos depositados na area debido á acción das mareas do inverno e tamén preparar a superficie areosa de cara á chegada do bo tempo para nivelar a area que moven as fortes mareas dos pasados meses.
