Catro persoas, entre elas tres menores, tiveron que ser trasladadas a un centro hospitalario ao presentar síntomas de intoxicación por inhalación de fume despois de declararse un incendio nunha casa en Ribeira.
Segundo a información recollida no 112 Galicia, as lapas calcinaron un colchón e roupa, e o fume chegou a afectar por completo á vivenda, situada na Avenida da Coruña.
Os feitos sucederon ao fío das catro desta tarde. Foi, nese momento, cando a Policía Local solicitaba ao 112 Galicia a mobilización dos equipos de extinción.
Acto seguido, os xestores do CIAE 112 Galicia pasaron o aviso aos Bombeiros de Ribeira e de Boiro e ao Grupo de Apoio e Emerxencias de Ribeira (GAEM). Ademais, desde o 112 Galicia solicitouse a intervención dos profesionais de Urxencias Sanitarias de Galicia-061.
