Boiro recupera a Semana Santa coas procesións e actos litúrxicos tradicionais. Así o anunciaron Plácido Amboage, responsable da Irmandade do Cristo da Misericordia, e o párroco local, Julio Cárdenas, que presentaron o programa acompañados pola concelleira de Cultura, María Outeiral.
O día 8, venres de Dores, celebrarase o arranque das actividades. Haberá un pregón a cargo do bispo auxiliar de Santiago de Compostela, Francisco José Prieto, e impoñeranse as medallas aos novos confrades no transcurso dunha misa ás 20.00 horas e culminará coa primeira das procesións.
Os fregueses regresarán o 10 á igrexa de Santa Baia para a tradicional bendición dos ramos, que se efectuará ás portas do templo, Hai programada unha celebración única, ás 11.00.
O Xoves Santo ás 21.00 horas comezarán o seu percorrido as imaxes do Ecce Homo, a Virxe da Amargura e a Soledad, que percorrerán as rúas arroupadas polos confrades da Irmandade do Cristo da Misericordia e todos aqueles veciños que queiran sumarse. Unha hora antes celebrarase a Cea do Señor.
O Venres Santo os actos comezarán ás 19.00 horas coa celebración da Paixón do Señor, para continuar coa escenificación do desencravo e culminar coa procesión do Santo Enterro.
O Sábado Santo será a Vixilia Pascual do 16 (21.00 horas) e as misas do Domingo de Resurrección (12.00 e 20.00 horas).
