A décimo terceira edición do Premio Rosalía de Castro de lingua, convocado pola área provincial de Normalización Lingüística da Deputación da Coruña vén de anunciar que a data límite para presentar solicitude remata o 29 de abril.
Con este certame quérese dar recoñecemento a iniciativas, traballos recentes, traxectorias de persoas individualmente, colectivos ou entidades comprometidas coa promoción e dignificación social do patrimonio lingüístico galego, tanto no eido da provincia como a nivel galego.
Cómpre dicir que o dito concurso está dotado con 15.000 euros, establecendo un premio de 5.000 euros por cada unha das súas tres categorías: á persoa e á entidade que máis salienten na promoción da lingua galega e ao proxecto concreto (ferramentas, publicacións/coleccións, portais, webs..) de dinamización lingüística que realice un traballo específico cos treitos da poboación de menor idade, infancia e mocidade e que atenda espazos emerxentes de uso da lingua co obxectivo de premiar a innovación e o futuro.
A xeito de curiosidade, sinalar que os gañadores e gañadoras da pasada edición (2021) foron: Xaquín Marín, na categoría A; a Agrupación Astronómica Coruñesa ÍO, na Categoría B; e, Twitter en galego, na categoría C. Outras e outros premiados en anteriores edicións foron: Pirilampo, Galipedia, Proxecto Apego, Correlingua, a Mesa pola Normalización Lingüística e Xabier P. Docampo.
As bases do Premio Rosalía de Castro de lingua poden consultarse no Boletín Oficial da Provincia do 15 de marzo e tamén descargarse dende unha ligazón específica.
