O salón de plenos do Concello de Muros acollerá este venres 11 de marzo, ás 10:30 horas, a presentación do libro Cultura do marisqueo na ría de Muros-Noia, da antropóloga Guadalupe Jiménez. O acto contará coa presenza dos alcaldes de Muros, Noia, Outes e Porto do Son (Inés Monteagudo, Santiago Freire, Manuel González e Luis Oujo) e dos patróns maiores de Muros, Noia, Portosín e Porto do Son (Daniel Formoso, Santiago Cruz, Isaac Gaciño e Emilio Queiruga). Rexedores e patróns asinarán o acordo que inicia o trámite formal para a declaración da cultura do marisqueo da Ría Muros-Noia como Patrimonio Cultural Inmaterial da UNESCO. Esta sinatura porá en marcha formalmente o procedemento ante as administracións responsábeis de outorgar a dita declaración: Xunta de Galicia, Ministerio de Cultura e UNESCO. Así, o primeiro paso será rexistrar ante a Administración autonómica a solicitude formal de inscrición no Catálogo do Patrimonio Cultural de Galicia.
Ademais, presentarase tamén o convenio marco coa Asociación Nacional de Mulleres da Pesca de Chile para avanzar na candidatura conxunta ante a UNESCO.
O libro Cultura do marisqueo na ría de Muros Noia é unha monografía elaborada por Guadalupe Jiménez Esquinas, profesora titular da Universidade de Santiago. Foi financiada polas Confrarías de Pescadores de Porto do Son e de Muros a través do GALP Costa Sostible, a Consellería do Mar e o Fondo Europeo Marítimo e de Pesca.
