A executiva do PSOE suspende as eleccións de Ribeira ao detectar anomalías en altas de militantes
A comisión executiva nacional galega determinou a través do secretario de organización, José Manuel Lage, a suspensión do proceso de renovación de cargos a nivel local convocado para este sábado.
Desde a dirección autonómica xustifícase a medida indicando que, nos últimos días, tivo coñecemento dunha serie de acontecementos que cualifica de máxima gravidade e que entende que poden afectar de maneira significativa á vida política da organización en Ribeira. Unha das causas da decisión estaría na detección de posibles anomalías en altas de militantes rexistradas durante os últimos meses.
A agrupación local viu duplicado o seu número de afiliados, ao pasar de 40 a máis de 80. Entre os novos integrantes figuran membros dun sector crítico coa executiva dirixida por José Manuel Vilas, o que orixinoi entón un conflito que acabou con denuncias por agresións na Policía Nacional e no Xulgado.
Ante esta situación, José Manuel Vilas continuará polo momento como secretario xeral do PSOE de Ribeira, dado que desde a comisión executiva nacional galega non se estableceu un horizonte para a convocatoria dunha nova asemblea.
A decisión tomada durante a tarde de onte polos órganos galegos da dirección socialista do partido foi comunicada aos militantes.
