Na liña de seguir apostando por procesos e hábitos sustentábeis e responsábeis ambientalmente a nivel local, o Concello de Porto do do Son anunciou que se vai sumar un ano máis á celebración, o vindeiro 26 de marzo, da Hora do Planeta. Trátase dun evento internacional ao que se suman milleiros de entidades e cidadáns co obxectivo común de concienciar á sociedade sobre a importancia de facer fronte común a prol do medio ambiente, cunha crise climática que é unha realidade incontestábel e ante a que cómpre actuar de contado. O xeito de adherirse á campaña é sinxelo: apagando as luces nun intre previamente acordado (entre as 20.30 e as 21.30 do día 26 de marzo). Con este xesto apóstase de cheo por un modelo enerxético de aforro, sustentabilidade, moito máis acorde coa conservación da natureza e dos recursos.
O Concello de Porto do Son súmase, un ano máis, á campaña da Hora do Planeta de WWF España en defensa do Medio Ambiente apagando os núcleos de Porto do Son e Portosín.
