O Centro Lustres Rivas de Ribeira acolleu o venres 11 de febreiro unha dobre actividade cultural relacionada cunha das grandes inspiracións das nosas escritoras e escritores: o mar. Este precisamente é un dos grandes ámbitos de traballo do escritor e economista cambadés Exidio Cuíñas, directivo da Escola de Vela do Club Mariño do Salnés, e do historiador e especialista en naufraxios Xosé Luís Moar, que estiveron no centro ribeirense para, por unha banda, percorrer diferentes acontecementos tráxicos na ría de Arousa, incluído o afundimento do Santa Isabel, e tamén, para presentar As gotas de mercurio, o novo libro de Cuíñas.
O acto constou de dúas partes. En primeiro lugar celebrouse unha palestra arredor do naufraxio do Santa Isabel, e outros episodios marítimos que tiveron como tráxico escenario a ría de Arousa. Acompañaron a Xosé Luís Moar e a Exidio Cuíñas a presidenta da Confraría da Dorna, Sara Sevilla, e o editor e investigador, Antón Mascato. Logo Exidio Cuíñas presentou a súa novela As gotas de mercurio un extenso traballo literario de máis de setecentas páxinas que, en palabras do autor, desenvolve “unha viaxe cara ningures” e que comeza co afundimento do Santa Isabel no arquipélago de Sálvora, e continúa coa fuxida que emprenden dezaoito homes a bordo dun pesqueiro, o Novo Endem, e que cincuenta anos despois devolve ao neto dun deles, Demetrios, á terra do seu avó, Abel.
