O BNG de Boiro renovou os seus cargos orgánicos despois da celebración da última asemblea nacional do partido. A agrupación boirense elixiu como novo responsable local a Alberto García, e como segundo a Francisco Javier Santamaría «coa intención de converternos na forza de referencia da maioría social na nosa localidade». García, quen é xestor cultural do Concello, accede por vez primeira a un cargo dentro da formación política onde «reforzar a organización e coordinar o traballo orgánico son as metas a cumprir a curto prazo».
Licenciado en Ciencias Políticas e técnico de Cultura desde hai 22 anos no Concello, Alberto García é o novo líder do BNG en Boiro. Seguidor de sempre da ideoloxía nacionalista, incorpouse na militancia da formación política hai uns anos para participar de forma máis activa nela.
