A concelleira de Servizos Sociais, Ana Barreiro, mantivo un encontro de traballo coa presidenta da Asociación TDAH Salnés, Becky Cameán, coa finalidade de seguir estreitando a colaboración entre ambas entidades e propiciar “sinerxías que redunden nunha mellor atención das persoas con trastornos por déficit de atención e hiperactividade, dislexia e necesidades educativas especiais (NEE), tanto do noso municipio como no resto da comarca”, sinalou a edil.
A reunión, que tivo lugar na Casa de Cultura Manuel Ayaso de Aguiño (onde a citada asociación ten a súa sede comarcal dende 2019), contou tamén coa participación da xefa de servizo dos Servizos Sociais de Ribeira, Fran Vidal, da secretaria/xerente de TDAH Salnés, Eva Silva, e do seu delegado comarcal do Sar, José Vaamonde.
No transcurso da xuntanza analizáronse, entre outros puntos, diversos proxectos e propostas que teñen que ver, entre outros puntos, coa mellora da formación e información das familias e docentes e co fomento dun ocio saudable e educativo.
Asociación e Concello anunciaron que seguirán conversando no ánimo de mellorar a realidade social e educativa das persoas afectadas e as súas familias.
