O Bloque Nacionalista Galego de Ribeira estivo apoiando a concentración convocada por PBBI co apoio do PSOE en Palmeira, para esixir que Portos de Galiza rectifique a actuación desenvolvida na explanada portuaria e que conta coa oposición veciñal.
Os membros do BNG, Cruz Rivadulla e Luís Pérez Barral trasladáronlle o apoido da formación nacionalista ás veciñas e veciñas concentradas, segundo dixeron, “a veciñanza debe ter voz e voto nos proxectos que sen fan na parroquia”. Pérez Barral, asegura que estamos ante unha actuación feita unilateralmente polo Partido Popular e que ten unha forte contestación social pois non se presentou nin se consensuou ante ninguén. Desde o BNG acusan ao rexedor, Manuel Ruiz, de mentir descarademente pois “o proxecto que se fixo acordaron levalo adiante o propio Ruiz e a presidenta de Portos, Susana Lenguas, nunha xuntanza mantida o pasado 20 de decembro”.
Por outra banda, Pérez Barral, asegura que Portos debería gastar os cartos en mellorar o deficiente estado de mantemento dos peiraos no canto de poñer barreiras que quitan estacionamentos e son auténticos obstáculos á accesibilidade. Por último, alén de trasladarlle o apoio á veciñanza, avanzaron que porán a situación en coñecemento da deputada Rosana Pérez, para esixir no Parlamento de Galiza que Portos rectifique e que todos os proxectos que se fagan no municipio teñan, necesariamente, o consenso e a participación da veciñanza.
