A portavoz nacional, Ana Pontón, aproveitou a homenaxe do BNG a Castelao na súa Rianxo natal para destacar a plena actualidade do legado dunha das personalidades políticas que máis ten contribuído á defensa de Galiza como nación. “Foi, é e será un referente, un imprescindible (…), poucos demostraron tanto amor e tanta entrega a este País”, subliñou, “por iso honramos a súa memoria e reivindicamos a vixencia do seu pensamento”.
Un legado do que o Bloque se sinte orgulloso herdeiro porque, alegou, “a esencia do BNG é defender Galiza, e quero recalcalo porque se ben o mundo de hoxe é outro, hai algo que non mudou: a necesidade do nacionalismo para darlle futuro ao País, que precisa como nunca unha forza política coas mans libres para defender os nosos intereses fronte a un centralismo cada vez máis madrileño que actúa de freo”.
Tamén agora, recalcou, “urxe un proxecto modernizador e vangardista, que pense Galiza en grande, con ambición e desde a confianza. O BNG, -dixo-, ten ese proxecto e a capacidade de poñelo en marcha”, priorizando os intereses dos galegos e das galegas en contraposición ós que practican “a confrontación estéril ou o servilismo inútil, ambos iguais de letais, igual de tóxicos”. “A defensa de Galiza, esa é a esencia do BNG”, recalcou.
Pontón preguntouse cales serían as estampas que hoxe incluiría Castelao nun álbum Nós inspirado na Galiza de 2022, e aventurou que o lapis creativo do rianxeiro denunciaría o centralismo económico e político, o espolio dos recursos naturais, a emigración da xente moza, o declive do sector industrial, a desesperación dos produtores que soportan prezos por debaixo de custe ou o retroceso do sector pesqueiro cunha frota cada vez máis minguada.
“Seguro que o impacto das cotas de pesca lle inspirarían unha estampa non moi diferente a aquela á que lle puxo por título As sardiñas volverían se os nosos gobernos quixesen”, destacou.
En clave local, destacou que o propio Castelao, “estou segura sentiría o mesmo orgullo que sinto eu, ao ver a transformación de Rianxo da man dun alcalde e dunha equipa de primeira. Parabéns polo traballo feito Adolfo e, sobre todo, forza para todo o que está por vir e a seguir así, demostrando que hai outra facer de facer política e que hai outra Galiza posíbel”, salientou en relación ao Executivo local liderado polo alcalde Adolfo Muíños.
Pontón empezou a súa intervención trasladando todo o apoio do BNG á veciñanza que se mobiliza en defensa da sanidade pública e de máis servizos para o concello, con referencia explícita a plataforma veciñal que reclama un centro de día en Rianxo, demanda compartida polo goberno nacionalista. E, no ámbito laboral, sumouse as “xustas e lexítimas” reivindicacións das traballadoras da conserva.
“Aquí na ría de Arousa, quero enviar o apoio ás traballadoras da conserva, por un convenio digno, porque é de sentido común o que reclaman, que se poña punto final á inxustiza de que os traballos das mulleres están peor pagados que os dos homes, e que iso pase en pleno século XXI. Xa está ben de discriminar as mulleres!”, proclamou na súa intervención tras o alcalde, quen destacou o papel dos concellos na construción dunha Galiza con futuro, e da responsable local, Mercedes Pimentel, que puxo en valor a figura de Virxinia Pereira, “o seu papel foi moito máis aló do de ser compañeira de vida de Castelao”, indicou.
