A mostra do centenario do Santa Isabel coa exposición “Bravura”, 100 anos do naufraxio do Santa Isabel chega o seu final o cumprirse o final do ano do centenario . A exposición inaugurada o pasado 2 de xaneiro aniversario do afundimento do vapor-correo relata o suceso desde a saída do vapor do País Vasco até o seu accidente nos baixos da Pegar na Illa de Sálvora, ademais do seu contexto cun capítulo especial dedicado á emigración, no que se
fai un repaso da emigración en Ribeira nos anos 20 e 30 a través do singular “libro de emigrantes” deste concello. A mostra será visitable ata o próximo 4 de xaneiro.
Na exposición pódense ver obxectos orixinais do barco como unha campá ou a luxosa vaixela de prata rescatada do naufraxio. Tamén as medallas que recibiu o segundo oficial do vapor Luís Cebreiro ou a creada especialmente para as Heroínas de Sálvora.
Entre os contidos inéditos, destacan as notas manuscritas de Valle Inclán sobre o naufraxio coas que o autor tiña previsto escribir unha traxedia que nunca chegou a ser publicada.
A mostra, instalada no Museo Municipal de Ribeira, inaugurouse o sábado 2 de xaneiro de 2021, no mesmo día no que, cen anos antes, a veciñanza ribeirense se botaba ao mar para acudir aos náufragos dunha das traxedias marítimas máis destacadas da historia de Galicia.
O vapor-correo “Santa Isabel”, con pasaxe emigrante cara a América, naufragou fronte costa da illa de Sálvora. Ía con 266 persoas a bordo, incluíndo á tripulación. Foi o terceiro maior desastre da navegación marítima de pasaxe do século XX en Galicia.
Ante a traxedia, xurdiron comportamentos humanos de solidariedade de mulleres e homes ribeirenses que acudiron ao rescate salvando e coidando aos 53 sobreviventes. Algúns recibiron destacados recoñecementos oficiais, como as coñecidas “Heroínas de Sálvora”. Catro mulleres que centraron a atención mediática da época durante meses, mesmo a nivel internacional.
