O Concello de Dodro vén de comunicar a incorporación dun importante equipamento para favorecer o correcto tratamento de refugallos e facilitar a colaboración da cidadanía das parroquias, evitando tamén a proliferación de vertidos incontrolados de residuos contaminantes en diferentes espazos naturais do termo municipal. Trátase dun punto limpo móbil destinado a dar servizo ás veciñas e veciños dos núcleos de poboación de Dodro en materia ambiental.
“Coa adquisición deste punto limpo móbil, no Concello avanzamos no cumprimento legal dos obxectivos de reciclaxe achegando a toda a poboación a posibilidade de contribuír coa protección do noso rico patrimonio natural”, explicaron fontes do Goberno local, engadindo que o servizo desprazarase por diferentes puntos do concello e “nel poderanse depositar residuos de orixe doméstica”.
Co fin de coñecer o funcionamento do novo servizo municipal, o Concello organizará charlas informativas en diferentes lugares e datas, cuxo calendario podemos ver a continuación.
