Fidel Vidal, escritor, investigador, psiquiatra e artista pictórico de Ribeira, agasallounos esta tempada cunha nova obra de seu, titulada A culpa do pai (Medulia Editorial). Foi presentada os días pasados en Ribeira, no Centro Cultural Lustres Rivas, nun acto no que o autor estivo arroupado por Xesús Laíño e Manuel Cartea, en representación da Asociación Cultural Barbantia, co-organizadora da convocatoria.
Segundo fixo saber o propio Fidel Vidal, o libro é un achegamento á figura do pai dende as contribucións achegadas por grandes obras literarias históricas ou de ficción, recursos que ilustran con mestría as complexidades das relacións paterno-filiais, obras entre as que se atopan o Hamlet de Shakespeare, o Edipo Rey de Sófocles ou O incerto señordon Hamlet de Cunqueiro; ou o pai todopoderoso de San Juan de la Cruz ou San Francisco de Asís. “Está o pai que impón a lei, pero se non houbese lei, non habería culpa”, dixo, aludindo ao principal miolo temático do seu novo libro: a imposibilidade de acadarmos a plenitude e a liberdade en canto non sexamos quen de superar de diferentes xeitos os límites que os que nos precederon ocupáronse de levantar ao noso arredor.
