20190923. A cidade de Ribeira foi escenario a noite do venres dunha numerosa concentración baixo o nome de Emerxencia Feminista. O motivo era clamar contra o machismo e os feminicidios. Portando pancartas, lanternas e luces acesas dos móbiles en cor violeta, unha manifestación partiu da praza do Concello de Ribeira para facer un percorrido polo casco urbano e regresar novamente ao citado emprazamento, onde se procedeu á lectura do manifesto.
O acto desenvolveuse na nocturnidade, pois “máis da metade das agresións e violacións ocorren pola noite, de madrugada, cando volvemos para casa”. No texto fíxose referencia a que, no que levamos de 2019, cometéronse “corenta e dúas agresións sexuais múltiples, das cales só no mes de xullo, foron nove.” Tamén se sinalou que no conxunto do Estado, denúncianse tres violacións diariamente e “aínda así un oitenta por cento non son denunciadas.” Ademais, indicouse que no que vai de ano “contabilizáronse setenta e catro feminicidios, trinta e dous deles, a metade, só este verán. O mes de xuño foi o peor de trece anos, sen esquecer, da outra banda, o incremento das agresións ao colectivo LGTBIQ+.” Así mesmo, expresouse que “neste mundo ser muller é máis perigoso que ser home, convivimos coa dúbida de quen será a seguinte. Estamos desamparadas. Non podemos confiar nunha xustiza que segue sendo patriarcal, nunhas institucións que miran para outro lado, nunha sociedade espectadora e cómplice. A violencia non é illada, é sistémica.”
Finalmente, rotuláronse na Columna das Vidas Fendidas os nomes das mulleres asasinadas ao longo deste verán.
