O Concello de Boiro, a través do departamento de Cultura e o grupo de voluntariado Turbina, comunicou a súa intención de celebrar un Nadal o máis solidario posíbel. Froito deste obxectivo, púxose en marcha unha iniciativa para xuntar recursos de primeira necesidade para as familias de Boiro a través do departamento de Servizos Sociais e as entidades Cruz Vermella e Cáritas.
Dende esta fin de semana en todos os centros sociais do municipio, así como nas actividades de cultura que se desenvolven durante o Nadal, haberá habilitados uns puntos de recollida de alimentos non perecedoiros para todas aquelas persoas que queiran colaborar. Ademais, converterase a carpa de actividades festivo-culturais nunha Carpa Solidaria, na cal, para acceder, será preciso aportar leite, aceite, galletas, conservas, legumes, pastas…
“Con esta iniciativa buscamos que nestas festas sexamos máis solidarios que nunca e que ningunha familia de Boiro pase necesidades”, afirmou a concelleira de Cultura, María Outeiral, quen lembrou que o Concello “traballa todo ano para atender a cidadanía en risco” e que durante o exercicio 2021 “ampliouse a partida destinada a gastos sociais, mediante unha achega da Deputación a través do POS+, ata 1.200.000 euros”. Con este investimento, dixo, ampliáronse e melloráronse servizos como son a axuda no fogar, emerxencia social, respiro familiar ou atención a persoas sen fogar.
