O próximo sábado 18 de decembro, ás 20.30 horas, a Orquestra de Cámara Galega (OCGA) ofrecerá un concerto na Sala Arcos Moldes do Auditorio de Rianxo baixo a batuta de Rogelio Groba Otero e coa actuación de Laura del Río como soprano.
A OCGA é unha das entidades musicais máis prestixiosas do panorama estatal. Con máis de cinco lustros en activo, a Orquestra constitúe un proxecto versátil e dinámico, abranguendo repertorios tradicionais e novos (desde o barroco até os nosos días) baixo o compromiso de “dar a coñecer a música de compositores galegos”, cunha especial mención á obra do devandito compositor Rogelio Groba Groba.
A Orquestra de Cámara Galega colabora con solistas de prestixio internacional como Teresa Berganza, Ara Malikian, Juan de Udaeta, José Ramón Méndez, José Núñez, José Luís Estellés, entre outros. Asemade, instituíuse como orquestra residente do Festival Groba, celebrado anualmente en Ponteareas e polo que pasaron artistas tan sobranceiros como o violonchelista noruegués Oyvind Gimse, a violinista coreana Jin Joo Le, Guillermo Figueroa, o frautista André Cebrián, o trompista David Fernández ou Esteban Batallán, trompetista principal da Orquestra Sinfónica de Chicago.
