A pianista e compositora galega Elsa Muñiz será a encargada de pechar o Programa de Música de Cámara 2021 organizado polo Concello e a Escola de Música de Rianxo. O concerto celebrarase este sábado 4 de decembro ás 20.30 horas no Auditorio Municipal.
A entrada é gratuíta e a reserva pode facerse na web do Concello. A reserva será efectiva cando se confirme dende o auditorio.
Traxectoria
Elsa Muñiz é pianista e compositora. Comeza os seus estudios musicais con tan só seis anos e fórmase no Conservatorio Profesional de Ribeira. Prosegue os seus estudos superiores no Conservatorio Superior de Música de Vigo e na Universidade Fryderyk Chopin de Varsovia. Nesta última universidade polaca, completa a súa formación cun posgrao en interpretación musical.
No ámbito da composición, crea un novo concepto para definir a súa música: o pianotelling. Isto é unha mestura de literatura e música para piano; cada unha das súas pezas fai referencia a un microrrelato baseado nas súas propias vivencias. Co pianotelling materializado no seu álbum Memories, xa superou o 1.500.000 de reproducións e os 500.000 ouvintes en todo o mundo en plataformas dixitais.
