Dende o grupo municipal da Marea Cidadá de Noia vense de esixir, no pasado pleno, unha regulación clara sobre o funcionamento e a instalación das terrazas nos locales hosteleiros do Concello de Noia. En palabras do seu voceiro Manolo Seijas, o Concello estaría a cometer “omisión da súa función reguladora”, ao funcionar a asignación de
terrazas por métodos “caciquís” e de “comisión de favores” ao goberno.
A instalación de terrazas “irregulares” é polo tanto un problema tanto para o propio sector, que non contaría ca seguridade xurídica necesaria para levar a cabo a instalación de ditas terrazas, como para a propia cidadanía que vería como o uso de chan público funciona de xeito totalmente anárquico e desregulado.
Se ben este é un feito que se leva producindo dende hai anos, segundo afirman dende a Marea Cidadá, a pandemia da COVID-19 e a flexibilización da situación das terrazas debido ás reducións de aforo en interiores agravaron enormemente o problema. Se ben afirman que comprenderon e apoiaron dita flexibilización, tamén recordan que dita
redución xa non existe e que cómpre atallar dunha vez por todas esta problemática.
Seijas apelou a Santiago Freire e ao resto da corporación a poñer fin a esta situación e facer dunha vez por todas o seu traballo: regular a asignación, instalación e mantemento das terrazas para conceder seguridade xurídica á hostelería e rematar dunha vez ca competencia desleal e o caciquismo.
