En Noia a patronal (Noia Histórica) e o Concello están a premer o acelerador para ter ao máximo rendemento (e co meirande número de locais adheridos) a plataforma local de comercio electrónico, comunicación e promoción comercial, o marketplace Vadetiendas, que se ofrece en galego e castelán con todo tipo de ferramentas e recursos. Estes días Noia Histórica iniciou unha campaña de divulgación, información e captación na que mostra as vantaxes deste servizo, tentando resolver as dúbidas que lles poidan xurdir ás empresarias e empresarios sobre comercio en liña e venda por Internet.
Lembran que se trata dunha plataforma de balde, doada e que non esixe compromiso nin coñecementos previos de mercadotecnia dixital ou doutros conceptos técnicos. As persoas interesadas poden anotarse a través de teléfono, Whatsapp, correo electrónico ou mensaxe a través do chat @concellodenoia. A maiores, este mércores 24 de novembro ás 20.30 horas está prevista a celebración dunha xornada informativa no Edificio do Casino de Noia.
Segundo sinala a asociación, trátase dun recurso axeitado para incrementar a capacidade de comunicación e a competitividade das empresas locais, sendo os únicos requisitos que se piden dispoñer dun computador con conexión a Internet. Grazas a Vadetiendas, os establecementos poderán contar dunha canle propia para vender produtos e servizos en liña.
