O Centro Dramático Galego vai facer parada en Rianxo, no Auditorio Municipal, para representar o seu novo espectáculo O Charco de Ulises, versión libre da Odisea adaptada ao noso contexto mediante a reivindicación dunha das principais características definitorias da historia narrada por Homero: a nostalxia da terra e do pasado irrecuperábel.
A recalada en Rianxo do CDG será este 25 de novembro ás 20.30 horas. A idade recomendada do espectáculo é de 14 anos, e ten unha duración de algo máis de unha hora e media. A entrada ten un custe de 5 euros e pode adquirirse a través do apartado de reservas da web do Concello.
A peza transcorre en paralelo co desenvolvemento argumental da obra de Homero: a viaxe de Telémaco na procura de seu pai (visitando a Néstor, a Menelao e Helena…) e a de Ulises polas diferentes illas nas que se atopa con personaxes fantásticos (Calipso, Circe, Nausícaa, Polifemo, o canto das sereas…). O fío argumental, segundo sinalou o Centro Dramático Galego na súa presentación, “vaise pegando e separando do mito orixinal, xerando un diálogo co clásico para xogar con el, para traizoalo en moitas ocasións e, sobre todo, para tratar o fenómeno da emigración galega cun marcado compoñente poético. E tamén para darlle unha nova dimensión ás personaxes femininas que aparecen na Odisea”.
