A Policía Local de Rianxo achegou o seu balance de actividade relativo ao trimestre xullo-setembro, período no cal, entre outros cometidos, os axentes rianxeiros efectuaron diversos operativos en coordinación coa Dirección Xeral de Tráfico nas campañas de seguridade viaria impulsadas polo dito organismo estatal. Como resultado das mesmas foron controlados 6.750 vehículos e condutores dando lugar a 44 propostas de sanción administrativas, 15 por condución baixo os efectos do alcohol, 8 por condución con presenza de drogas no organismo e 21 por infraccións de velocidade.
Dentro dos mesmos operativos instruíronse dilixencias penais sendo postos a disposición xudicial 10 condutores, 9 por facelo baixo os efectos do alcol -1 deles atopándose implicado nun accidente de circulación- e 1 por condución con cancelación de vixencia por perda total de puntos.
En materia de seguridade cidadá procedeuse a propoñer para sanción a 3 persoas por infraccións varias á Lei 4/2015 e máis á posta a disposición xudicial de 3 detidos por diversos ilícito-penais (tráfico de drogas, reclamación xudicial e atentado a axentes da autoridade).
Asemade, no capítulo do balance trimestral adicado aos operativos en materia de policía administrativa, os axentes locais propuxeron para sanción a 62 propietarios de terreos con carencia de limpeza, os cales foran requiridos para proceder a dar cumprimento á normativa en materia medioambiental, e tamén procedeuse a efectuar 60 propostas de sanción por infraccións urbanísticas e ocupacións de vía pública carecendo das licencias e permisos oportunos e a 9 propietarios de animais por incumprimentos relativos á lei de protección e benestar animal e ordenanza de limpeza.
