20190916. O Liceo Marítimo de Ribeira foi escenario dunha reunión entre cargos institucionais e orgánicos do PSdeG-PSOE. Concretamente, o encontro contou coa presenza de concelleiros socialistas na área do Barbanza -Outes, Noia, Porto do Son, Ribeira, Muros, Rianxo, A Pobra do Caramiñal, Lousame, Mazarios, Boiro, Dodro e Padrón- e representantes na Deputación, Sandra González; no Parlamento, Teresa Porrit; e no Congreso, Pilar Cancela.
O obxectivo desta xuntanza residía en falar e avanzar en proxectos e proposicións que afectan a esta zona. Así, algúns dos asuntos a tratar foron xestións directas que concirnen á cidadanía a nivel local, comarcal, provincial, autonómico e estatal. Deste xeito, abordouse a circunvalación de Ribeira, o Centro de Día en Rianxo, a concentración parcelaria en Rianxo e Lousame, a planta de residuos de Servia en Lousame, o saneamento das rías de Muros-Noia e Arousa, a depuradora de mexillón en Castiñeiras e o tren do Barbanza.
En definitiva, desde a formación política sinalan que a finalidade era dinamizar as doce agrupacións da comarca, así como apoiar nos distintos estamentos administrativos as súas demandas.
