20190913. A corporación municipal da Pobra do Caramiñal celebrou onte un pleno extraordinario ao que se levaron cinco puntos a tratar, tres dos cales saíron adiante. O primeiro, relativo ao Plan de Obras e Servizos (POS), foi aprobado por unanimidade. O segundo asunto a abordar foi a modificación na Relación de Postos de Traballo (RTP), trasladando ao tesoureiro do grupo C1 ao A1. Esta medida saíu adiante cos votos a favor de tódolos grupos, exceptuando ao PP. Tamén se aprobou por unanimidade a cuestión sobre a modificación en torno ao Plan Madruga, para que as crianzas poidan entrar antes ao servizo facilitando a conciliación.
Por outra banda, ao igual que sucedera no pleno de organización, lavouse novamente a contratación de persoal eventual para a secretaría da Alcaldía cunha retribución de 26.007 euros brutos anuais, así como a dedicación exclusiva da edil Estefanía Ramos, encargada da Concellería de Servizos Municipais, pois desde o goberno local consideran que “hai que estar a pé de obra, diariamente, en contacto con tódalas brigadas, que non son poucas, e que esixe moitísimo tempo.” Os votos en contra do BNG e PP impediron que saísen adiante ambos puntos, feito que marcou a sesión. A voceira de Nós Pobra, Charo Varela, acusounos de “facer oposición para que os servizos funcionen peor e logo vir aquí para contar o mal que o facemos.”
