O Concello de Ribeira informa de que se están a instalar no paseo do Malecón da cidade un total de 26 atraccións, todas elas pertencentes a industriais feirantes radicados no noso termo municipal, de acordo co compromiso adquirido polo goberno local no pasado xuño con este colectivo no ánimo de axudarlle a sobrelevar os efectos económicos do covid.
Precisamente o empeoramento da situación epidemiolóxica foi a que impediu que a colocación destes postos tivera lugar a principios de agosto como estaba previsto (cadrando coas datas habituais das festas de verán), habéndoa que postergar ata que mellorase a incidencia. Finalmente, as atraccións comezarán a operar a partir deste domingo 29 de agosto ata o luns 6 de setembro (nesta última xornada, con descontos especiais).
Consonte co anterior, o sábado 4 de setembro non se celebrará o mercadillo.
