O BNG e PSdeG-PSOE rianxeiros chegaron a un acordo non só de cara ao pleno de investidura que se celebrará o sábado, senón tamén un pacto de goberno. Adolfo Muíños, primeiro na lista do BNG e actual alcalde en funcións, manifestou que será “un goberno de coalición, o cal dará unha maioría estable para os próximos catro anos.” Pola súa parte, María del Carmen Figueira, número un na lista socialista, cualificou o acadado de “moi positivo”, xa que consideran que poden aportar numerosas cousas a Rianxo.
Os resultados das eleccións municipais non variaron moito respecto aos do ano 2015. A lista do BNG, liderado por Adolfo Muíños Sánchez, logrou ser a máis votada mantendo así os 6 concelleiros, pero sen acadar a maioría absoluta establecida en 9. Ademais, o PP de Germán Allut Vidal obtivo 4 actas, ao igual que o PSdeG-PSOE con María del Carmen Figueira Ares á cabeza, pero con menos votos que os populares, mentres que Rianxo en Común capitaneado por Julián Bustelo Abuín conservou os 2 edís cos que xa contaba. Ciudadanos irrompeu no panorama político rianxeiro con Sara Resúa Patiño acadando o seu único escano e o Compromiso por Galicia de Mª Xosefa Comojo Sobradelo quedou fóra do consistorio.
