O Campo do Bosque, no concello de Dodro, vai ser este sábado 21 de agosto unha festa da natureza e do lecer en familia máis envorcado na súa reivindicación e no seu coidado. Falamos do espectáculo A Eira do Paporrubio, da Compañía Paporrubio, que inclúe xogos diversos e creativos, monicreques, música e tradición oral para familias con nenas e nenos maiores de dous anos. A cita será como dixemos no Campo do Bosque, en horario de 11.00 a 13.00 horas e de 14.00 a 16.00 horas. Será de obriga levar máscara. A organización garantirá todas as medidas necesarias para cumprir os protocolos anti-COVID.
A Eira do Paporrubio forma parte do programa da Rede Cultural 2021 da Deputación da Coruña.
Os xogos do Paporrubio, segundo informa a produtora Urdime, constitúen un compendio de xogos autónomos e animados de temática agraria, que nos dá a coñecer un dos paxaros máis pequenos, rebuldeiros e cantaruxeiros da nosa fauna. Os participantes nesta aventura, guiados polo mestre de cerimonias (o Paporrubio) terán que ir descubrindo como se xoga a algúns dos xogos, mentres que se sorprenderán noutros deles grazas ás pequenas historias contadas e cantadas polos animais e habitantes da granxa, elaborados con xoguetes, marionetas e xigantes.
