A oficina municipal de turismo enclavada no Malecón serviu de escenario esta mañá para dar a coñecer o novo merchandising de Ribeira inspirado no Camiño de Santiago ‘A Orixe’ e no Xacobeo deseñado por un artista de
referencia dentro é fóra das nosas fronteiras como é Manuel Ayaso e confeccionado por unha empresa local: Laguerzza.
No acto estiveron presentes, ademais do artista de Aguiño, Olga Blázquez e Pura Muñiz como integrantes de Laguerzza; a técnica municipal de Turismo Sandra Fernández; o presidente da Asociación de Amigos do Camiño A Orixe, Manuel Mariño; e o alcalde de Ribeira Manuel Ruiz, entre outros.
Segundo explicou Ayaso, a idea naceu de Pura e Olga, que se puxeron en contacto con el para propoñerlle facer un deseño para este proxecto. Ao mestre pareceulle tan interesante que ao final fixo varios deseños que se acabarían por replicar en diferentes formatos: camisetas, tapabocas, vestidos, tazas, bolsas, suadoiros, etc…
Manuel Mariño transmitiu o apoio desta iniciativa e cualificou de prezosos os deseños e de fabulosa a idea. Ademais, mostrou a súa confianza en que ‘A Orixe’ se erixa no Camiño de Santiago deste milenio.
Na última das intervención, Manuel Ruiz afirmou que para materializar esta idea xuntáronse “dous importantes astros” como son Laguerzza, coa súa calidade nos seus materiais e forma de traballar, e Manuel Ayaso, o máis insigne pintos deste concello; e salientou que con esta iniciativa todos aqueles que acudan ao noso municipio e queiran
levarse un recordo terán neste merchandising unha excelente opción.
A listaxe de puntos de venta dos artigos integrantes deste merchandising está en fase de desenvolvemento. Así, ademais do no propio establecemento comercial de Laguerzza na rúa da Rosalía de Castro xa se poden mercar na tenda A de Eva en Corrubedo —pobo arranque do Camiño A Orixe— e a intención é contar con toda unha serie de puntos de venta ao longo do traxecto xacobeo.
Ademais, o merchandising está en exposición nas oficinas municipais de turismo radicadas en Xarás e no Malecón.
