O Concello de Rianxo informou do inicio das obras destinadas a mellorar a fachada sur do Pavillón Polideportivo municipal. As tarefas están a ser desenvolvidas pola empresa Romay e Fillos e consisten na optimización do illamento da dita vertente sur do inmóbel. A obra conta cun orzamento total de 36.574,46 euros dos que 29.259,56 euros son financiados a través dun convenio de cooperación entre a Secretaría Xeral para o Deporte da Xunta de Galicia e o Concello, na persoa do alcalde de Rianxo, Adolfo Muíños.
O Concello prevé que os labores rematen no prazo de dúas ou tres semanas deste mes de agosto. Os traballos obrigaron á instalación dunha unha estada que ocupa parte da zona de aparcadoiro da piscina. Para a mellora térmica instálase un illamento SATE de 60 mm que facilitará a impermeabilización para un posterior repintado. Esta actuación forma parte dun proxecto máis completo que irá poñendo o día estas instalacións municipais en sucesivas fases que se inician resolvendo o illamento da fachada máis exposta a chuvia.
