Acompañado de centos de persoas, Alex Vidal acaba de recibir na praza de España a Medalla de Ouro do Concello nun acto organizado na véspera da súa marcha á capital de Xapón para participar nas Paraolimpiadas de Toquio 2020.
O evento arrancou baixo os acordes da Marcha do Antigo Reino de Galicia para dar paso a continuación ás palabras de benvida da primeira tenente de alcalde María Sampedro. Tomou a palabra Juan Luis Martínez, do Natural Sport, quen manifestou que este un dos días máis felices da súa vida e tivo palabras de recoñecemento ao traballo doutros compañeiros como Adrián Jiménez, Raúl Bouzas, Luis Casais ou José Francisco Agrelo para que Álex vaia ben
preparado á súa experiencia olímpica.
O alcalde Manuel Ruiz afirmou na súa intervención que independentemente do que poida facer en Toquio “Álex é medalla olímpica dende a súa infancia”, posto que “é un exemplo de superación e de non querer nunca por debaixo de ninguén porque o seu esforzo ía facer á altura de calquera”. Destacou que para apoiar os deportes de combate A Fieiteira vai contar cun centro de tecnificación co-financiado por Concello e Xunta. “Moitas grazas polo que nos tes dado e oxalá nos poidas dar algo máis, aínda que só sexa de bronce de prata ou de ouro”, rematou.
Despois de manifestar que cando perdía sempre recibiu ánimos dos seus veciños, o tetracampión mundial e europeo Álex Vidal compartiu a promesa de que “o día 2 de setembro voume deixar ata a última gota de suor por deixar esta cidade no máis alto”. Tivo palabras de admiración para Ana Peleteiro, a primeira medalla na historia do municipio, e para María Vilas, a primeira olimpista. Tamén eloxiou o seu equipo e en especial ao ribeirense Lois Tomás, que viaxa con el. O evento terminou co Himno Galego e unha foto de familia das autoridades presentes co homenaxeado.
