A Deputación da Coruña vén de presentar Mocidade Creativa, u programa co que busca impulsar e dar a coñecer o traballo de mozos e mozas artistas a través de seis microfestivais que terán lugar este verán nos concellos de Noia, Boiro, Outes, A Pobra do Caramiñal, Valdoviño e Ames. “O programa pretende dar apoio ás e aos artistas máis novos da provincia fronte ás dificultades que estes se atopan para mostrar a súa creatividade”, comentou a deputada da área de Mocidade, Sandra González.
Os microfestivais correspondentes á zona celebraranse en Noia (31 de xullo), Boiro (7 de agosto), Outes (7 de agosto), A Pobra do Caramiñal (14 de agosto). Estas actividades incluirán concertos musicais de diversos estilos, espectáculos de maxia, exhibicións de baile, monólogos ou talleres de cultura urbana.
En Noia, as actuacións musicais con Monoulious Dop e Banda de Rap comezará ás 22:00 horas no Malecón de San Lázaro. En Boiro, The Cuncas, Manuel Astray e Las Hijas de ZP actuarán no Parque da Cachada a partir das 11:00 horas. Carolina Ageitos, Adrián Regenco e The Rapants participarán en Outes, no Peirao do Freixo a partir das 20:45 horas. Por último, na Pobra levarase a cabo un taller de DJ e produción, graffiti e un coloquio sobre a figura da muller. Os talleres serán a partir das 12:00 horas e as 17:00 horas, e a charla será de 18:00 a 19:00 horas.
