O Concello de Noia informou do comezo dos traballos para acondicionar o antigo estaleiro de Hermida, no lugar de Abruñeiras, co obxectivo de convertelo na nova sede dos remeiros do Club de Mar de Noia, que a día de hoxe non contan cunhas dependencias cen por cen axeitadas para a súa actividade.
Este proxecto de posta en valor dun edificio histórico que levaba anos abandonado será posíbel grazas á colaboración entre o propio Concello, a Dirección Xeral para o Deporte e a Consellería de Medio Ambiente.
Os traballos veñen cun investimento de 470.000 euros. O resultado será un edificio de dous andares e cunha superficie total construída de 1.246 metros e algo máis de mil metros cadrados de superficie útil. Incluirá dous hangares para as embarcacións, aseos e vestiarios (no andar baixo) e un ximnasio de máis de cen metros cadrados, maquinaria diversa de adestramento, unha sala de remo interior e despachos (no andar superior).
