Rianxo vaise estar este verán no punto de mira da lusofonía: o sitio onde se atopan, comodamente e cunha manchea de cousas en común, as diferentes vertentes da cultura galego-portuguesa. O motivo? A celebración, do 25 ao 28 de xuño no auditorio de Rianxo, da actividade formativa Galego, porta aberta para o mundo: Lingua, pensamento e cultura na Galiza e Portugal. Trátase dun curso de verán da USC, de 32 horas lectivas e dirixido pola profesora e escritora Teresa Moure, autora de importantes fitos literarios recentes da nosa cultura (Ostrácia ou Um elefante no armário) e exemplos, tamén, do encontro lingüístico entre ámbalas beiras do Miño.
O curso conta con financiamento da Secretaría Xeral de Política Lingüística da Xunta de Galicia, da Academia Galega da Língua Portuguesa, da Associaçom Galega da Língua, da Deputación da Coruña e do Concello de Rianxo. Os obxectivos deste programa de formación, en palabras das ditas entidades, é “divulgar a importante pegada da lingua e da cultura galega” e “analizar (e vigorizar) os contactos interculturais xa vixentes entre Galicia e Portugal, a partir da noción de lusofonía”. En resumo, o que se busca é fortalecer as ligazóns entre o galego e o portugués, amais de favorecer a presenza da lingua irmá nos nosos medios de comunicación. O curso non ten límite de prazas.
